長和系重組，除咗帶上政治眼鏡，話李超人乘機遷冊之外，各方讚好，一啲投資銀行家對左丁山講：「以deal論deal，呢次重組確係Win Win Win嘅好deal，大股東得益，集團架構更清晰，小股東則受惠股價上揚，對我地銀行家嚟講，遷冊與否，毫不重要，如果唔遷冊，整個重組根本係蜀道難行，香港法例會構成好多阻力。」
碰啱老友記中大校友黃桂林來電，立即捉住呢位前美林投資銀行主席問幾句：「霍建寧是否益自己女婿？」黃桂林話：「呢個講法好唔公道，我以前在任時，美林與和黃已經有不少生意來往，大家好熟嘅，霍生女婿係美林亞太區CEO，平時勤力到加零一，既聰明，又經驗豐富，與香港任何一位投資銀行家比較，都幾難搵人贏到佢。」
唔，咁樣黃桂林又點樣評價呢次重組呢？黃桂林話：「不在其位，難謀其事，我無以置評，我打電話俾你係想請你聽歌劇，我最近忙到一頭煙，幫手製作歌劇唐璜，一月二十七日於大會堂上演，想送飛俾你，你有冇時間？」凡係音樂會、歌劇、話劇之類，都慣咗晚上八時上演，與左丁山之睡覺時間表殊不吻合，唯有推之哉，跟住黃桂林傳來資料，呢個歌劇係由「香港教師愛樂合唱團與龔冬健唱家班」製作嘅，由一位來自馬爾他嘅莫扎特專家史森巴利（Brian Schembri）擔任指揮，史森巴利係馬爾他愛樂團藝術總監暨首席指揮，曾任英國皇家愛樂樂團、倫敦愛樂樂團、倫敦莫扎特演奏家樂團、里昂國家愛樂團嘅客席指揮。至於龔冬健，本是國際著名男中音歌唱家，畢業於上海音樂院，後赴美國，得過紐約全國音樂家聲樂比賽冠軍，長期在美國舞台表演，2011年以優才計劃移民香港，於是在香港教導私人唱歌，指導新進，黃桂林自美林退休後就跟佢學聲樂，依家可以上台表演㗎，今次就係龔冬健啲學生與香港教師愛樂合唱團合作，上演莫扎特著名歌劇「唐璜」。左丁山細路哥時，睇過大明星愛路夫連（先父之偶像）主演劍客唐璜，一路有個印象以為唐璜係情聖劍客，點知大個仔睇過一次莫扎特歌劇，唐璜（Don GioVanni）之後，先知道唐璜係一位採花賊！呢齣歌劇音樂好聽，歌曲悅耳，劇情大眾化，係值得一睇嘅。