【本報訊】歐洲央行放水十萬億元，歐元兌港元匯價低處未算低，跌穿九算，吸引港人報團到歐洲狂掃名牌手袋、名錶，甚至原隻西班牙火腿抬返港。有旅行社稱，新春團團費平均加價一成，惟獨歐洲團罕有減價4%，報團人數迄今升一成，需增加航班應付需求；新春後，五千元歐洲扺玩團更湧現。有專售旅遊套餐的旅行社近日劈價達四成售飛歐洲機票，三千多元有交易，再加全新歐洲購物套餐。
新春機票劈價四成
被封為「超級港女」的旅遊節目主持杜如風眼見歐元跌穿九算，昨坦言「心動」想馬上飛歐掃名錶勞力士、鞋履等，她說：「我喺兌10算嗰陣去咗一轉歐洲掃鞋，𠵱家歐元跌成咁，我一搞掂手頭工作，即去歐洲主力掃『勞』。」
專業旅運市場及產品管理總經理劉美詩表示，歐元跌破九算，旅行社馬上屯重兵瞄準歐洲巿場，剛成功與土耳其航空合作，推出適用於歐洲十四國家的優惠機票，較正常機票劈價三、四成，約售三千四百多元，更適用農曆年出發，「呢個價全年都可以買，唔係限時預訂，係三、四年嚟最平」。另推出的歐洲機票連三晚酒店套餐，以飛最熱門巴黎計，亦減價三成五，售五千五百九十元，「啱啱先推出，已經接到唔少客人查詢購買」。
劉又強調，公司即將推出全新歐洲購物旅遊套餐，「同歐洲大百貨公司合作，套餐除咗機票連酒店，會加埋百貨公司啲購物優惠券」。
永安旅遊副總經理馬世文表示，歐元下跌始於去年第四季，報歐洲團顧客趨升；至今年歐元持續下跌，新春歐洲團明顯跑出，要不斷增加航班，「農曆團平均加幅一成，歐洲團費不升反跌3至4%，十天團賣一萬五千蚊，同五天北海道團相若，歐洲團生意額罕有按年升一成，係近呢幾年最好」。
馬稱，冬季歐洲團日短夜長，團友主力到歐洲掃貨，巴黎及米蘭最受歡迎，旅行團會預留一天供團友購物，「喺巴黎主要買LV、Gucci、Hermès，去米蘭就買時裝多」。他說，瑞士法郎與歐元脫鈎，瑞郎升值，但當地店舖貨品仍屬升值前的標價，港人亦把握時機來瑞士購買勞力士等名錶。
南歐買瑞士錶最抵
他教路說，精明團友會到南歐如葡萄牙、西班牙等鐘錶店購買瑞士錶，「款式冇瑞士咁多，勝在當地仲係用歐元，買勞平好多。有團友成隻西班牙火腿買返香港」。他說，料歐元會持續下跌至八點五算，未來半年歐洲團團費持續下跌，新春後，五千元抵玩歐洲團會湧現。
康泰旅行社董事總經理黃進達表示，歐元下挫刺激不少港人往歐洲旅遊，稍後重點推介可購物的歐洲團。旅遊業議會議會總幹事董耀中指，新春歐洲平價團平均團費按年下跌逾一成，售一萬一千多元，貴價團更下跌近四成賣二萬六千多元，「係近五年嚟最平」。
■記者蔡朗清