試想想你忽然收到基金經理嘅信，話唔好意思呀，我輸晒你嘅錢，咁你會點？美國真係有位咁攞膽嘅基金經理喎。
CNBC報道，美國紐約Canarsie Capital嘅創辦人Owen Li本周二向客戶發信，話自己「真係唔好意思」，管理資本由舊年三月嘅七億八千萬元（一億美元），輸到得番一百五十六萬元（廿萬美元），即係差唔多輸晒。
佢認衰，承認自己「過份貪心」，由於舊年十二月基金表現差，佢喺過去三個星期做咗一系列好急進嘅交易，包括股票期權、直接投資等，但係孖屐同佢對着幹，佢於是貪字得個貧，輸晒客戶嘅錢囉。CNBC有搵過呢位李生，但搵唔到，唔通佢驚班客仔搵佢發洩，行開咗？
其實，買得基金都係長線投資，與其畀錢人管，又要畀管理費，不如自己買堆高息股放埋一邊啦。