等咗好耐，《失蹤罪》終於出藍光影碟。
編輯不厭其煩WhatsApp龍叔叔追稿，幾乎係每個禮拜嘅例行公事，明明大方向都仲未度好，但總會厚顏無恥講大話：「差唔多，爭個尾！」就算明知係敷衍，但呢句嘢都好重要，起碼人哋搵到你嚟鬧。失蹤，從來只係寫稿佬嘅罪，冇諗過大衞芬查可以玩得咁癲咁盡。
戲名來自導演的另一齣經典《七宗罪》，戲名系列化一向係香港片商嘅情意結，務求觀眾一聽戲名，就知套戲sell乜。當初電影上畫時，龍叔叔懶叻咁估，咪又係老婆失蹤，老公四出追查，點知兇手就係精神分裂嘅自己。放心，咁膠嘅佈局只得CCTVB會用。相隔二十年，由《七宗罪》到《失蹤罪》，大衞芬查玩驚慄懸疑依然得心應手，最勁係新作長達兩粒半鐘，幾乎全無血腥暴力場面，齋用角色對白同劇情走向，帶出一浪接一浪震撼人心嘅佈局。英名片名叫《Gone Girl》，實在高章有意境得多，就算台灣譯嘅《控制》，亦較切合劇情走向。龍叔叔唔想劇透，只可以講套戲係圍繞夫妻嘅感情處理，由甜蜜、猜疑到痛苦，都因互相需要而無奈接受。結尾某個角色一句：「這就是婚姻了。」相信已婚人士睇完，會有更深刻嘅體會。
結構完整冇犯駁
電影由同名小說改編，較突破嘅係導演讓作者做番編劇，點樣將劇情壓縮、去蕪存菁，全由作者話晒事。所以《失蹤罪》比其他改編電影嘅優勝之處，就係保留到好多小說入面嘅細節，冇乜犯駁位同粗疏，故事結構較完整。
片長兩粒半鐘，而且講多過做，龍叔叔居然冇半個呵欠，劇情推進流暢，你會好心急等住一個一個謎團逐步解開，影片由前半搞懸疑，到後半謎底揭開嘅驚悚，心臟會隨住劇情反覆起伏，不靠花錢搞特技噴血漿，都有本事帶出感染力，除左一代宗師史提芬京外，大衞芬查亦做咗個上佳示範。
選角亦值得一讚，龍叔叔好鍾意男主角Ben Affleck，由《絕世天劫》到《珍珠港》，都好欣賞佢風流而不下流嘅演繹方式。佢嘅表現已算合格令人收貨，可惜女主角Rosamund Pike嘅角色太有發揮喇，而且演出實在精采，佢所做嘅每件事，都深深咁吸住觀眾嘅眼球，就算Ben Affleck露埋何B仔，風頭始終都係被蓋過。
7.1聲效夠震撼
雖然港版BD冇乜花巧嘢，不過龍叔叔就好鍾意佢硬紙套嘅包裝，比過往膠盒同鐵盒更薄更易收藏。影音表現算中規中矩，冇特技冇3D，畫面偏向生活化，不過收錄咗DTS-HD MA 7.1，喺好多高潮位，都有效擴大震撼力。唯一要彈嘅係bonus冇睇頭，只收錄咗導演講評soundtrack，仲要冇中文字幕，要留番有精神先慢慢聽喇。
Profile：
簡介：幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。 http://www.facebook.com/uncle.dragon.movie
