逢周五，咖喱牛腩都會跟大家暢談球壇的人和事。既會嘻笑怒罵，寫出激情，亦會冷靜分析，寫出理性。
香港樓價年年升，樓價入息比率已經升到十七倍，即係話一個打工仔要連續十七年唔食唔飲先可以買樓，小弟已經唔介意再推遲多一、兩年，每個月花幾百蚊睇收費電視，但係曼聯可唔可以唔好咁悶呀。
上星期六晚，開定包薯片雪定啤酒欣賞英超大戰，點知愛隊阿仙奴，星期日先出場，車仔又狂風掃落葉上半場已經大勝，咁就惟有轉台睇曼聯作客昆士柏流浪啦。咁講真，好似入場睇變型金剛復仇者聯盟咁，唔通睇佢哋劇情咩，梗係睇大製作大明星，特技又點樣炸爆香港芝加哥。曼聯求其搵個後備仔都話拎緊十萬八萬鎊周薪，今季初又話使咗億幾鎊擴軍，領隊雲高爾（圖）仲帶荷蘭殺入世盃四強，幾威呀。
點知越睇越唔對路，成隊曼聯好似打機方向掣壞咗咁，成日喺度橫傳，係就係控住個波，不過贏控球指數，偶然一次直線傳送，就交咗畀人；雲高爾教過巴塞隆拿啫，不過應該唔係Tiki-taka派系喎。
紅魔今場全場有七個中目標射門，仲入兩球，場波悶咩，雲高爾都識提高吓娛樂性，好似搵菲爾鍾斯開角球，真係天才先諗到。紅魔球迷唱4-4-2歌，希望踢番4-4-2，雲高爾就真係當球迷唱歌，仲話曼聯全球球迷有6億人，聽得邊個建議先啱，呢句說話真係有見地，特首下年應該加呢句落施政報告度啦。
文：牽牛