政府公佈施政報告，立法會門外，除了見慣見熟的示威人潮，還有一身素白的她。天寒地凍，獨個兒將一千隻雞蛋往自己的頭上擲，「當權者容不下一隻雞蛋，雞蛋係為下一代，向我哋呢代人掟」。鮮黃的蛋漿，自頭頂髮絲向下流，染黃素白衣服，斑斕刺眼，場面震撼。「每隻雞蛋，都係一把吶喊嘅聲音」。用蛋漿記錄滿腔心事，映襯當權者以強權壓低異見的怯懦，她是非常媽媽張嘉莉。
不要以為行為藝術家大都易憤怒，動輒掟嘢手指指，眼前的張嘉莉，更像個慈母，面上掛着微笑，平和有禮。位於太子的唐樓工作室，牆角還有童書和小玩具。兩個女兒分別讀初小及幼稚園，閒時湊女教畫，生活本該寫意，但過去幾年，她與無數港人一樣，坐上過山車，「我哋呢一代人，連自己家園都無力保衞，作為媽媽，真正愧對下一代，惟有將雞蛋擲向自己」。
四口家總動員上街
擲蛋有聲，這個非常媽媽卻說很無力：「宋代古蹟留不住、海洋生態因迪士尼擴建要讓路，東北發展幾多人反對都好，城規會一樣通過。」有人試着向梁振英擲蛋表達不滿，事後被帶走，「當權者不聽民意，仲製造白色恐怖，好痛心」。決意走上街頭，展示無能力量，但滿頭的蛋漿，能否喚回當權者廣納異見的量度？不知道。但她說做了應做的事，心安理得。
「做咗媽媽，責任更大。好多人都話要移民，但我覺得，唔單止對人，對一個地方，都要有責任，唔係邊度生活好，就走去嗰度，其他地方有好嘅體制，都係前人付出努力先有改變」。受社工出身、轉型從事藝展策劃的丈夫影響，張嘉莉一直關心時事。○二年自美國大學畢業回港，主修純藝術的小妮子，即遇上躁動的香港。
「○三年沙士、負資產，又有廿三條立法，好多問題。之後每一年嘅七一，都會上街」。由拍拖上街、遊行訂婚，第一次做媽媽，到四口之家出動齊叫口號。七一，紀錄了她不同的人生片段，也讓她愛上以行為藝術方式，為例行公事似的示威，賦予新意義。「○四年因為訂婚，着咗長衫馬褂遊行；翌年又將裙褂照剪影造成人形膠板，寓意政府當民意透明」。
二○一一年，她帶着白色氦氣球到政府總部「放生」求天保佑；到梁振英上台，兩囗子又赤腳上街，希望當權者施政腳踏實地。「擲一千隻雞蛋，我知有網友批評好浪費，但其實蛋漿蛋殼都會回收做農場肥料，不過我接受有彈有讚，我嘅藝術未必代表一定好，但若果可以引發反思，就好值得」。藝術高低，見仁見智，但非常媽媽的量度，卻高下立見。
■記者呂麗嬋
