將於星期日舉行嘅渣打馬拉松，其中一個亮點就係1.8公里「領袖盃」，事關每年都有幾十位政商界名人落場跑。可惜，出名係財經界運動健將嘅會德豐（020）主席吳宗權今年又話唔跑，可能佢覺得路程實在太短，十分鐘內跑完，嫌費事喇。
吳宗權之前跑過兩年渣馬領袖盃都上到頒獎台，不過舊年佢同阿爸，即係九倉（004）主席吳光正都冇參賽，呢次佢兩父子繼續唔玩。渣打大中華區行政總裁洪丕正作為主人家，如無意外應該就會落場。
今年領袖盃同舊年一樣，有超過四十人參賽，依然係由灣仔運動場起步，終點係維園，以正常速度，十幾分鐘點都跑完。美國總商會前主席詹康信千金Jennifer Harvey過去連續三年攞冠軍，十分跑得。但好多人其實志在參與，1.8公里半跑半行當晨運都唔錯吖。