「你肚唔肚餓呀，我煮個麵畀你食吖。」大婆台十年如一日嘅電視劇台詞薰陶下，對呢句說話真係熟到爛。但如果有人講「我煮個『泡麵』畀你食吖」，費清當堂會毛管戙。泡麵？香港人唔係咁講㗎喎。但大快活最近就用咗呢個詞語。
#唔夠親民本土
事緣有讀者報料話最近去大快活，見到下午茶餐牌一款食物，寫住「迷你餐肉蛋泡麵」（圖），係用「泡麵」而唔係港人常用嘅「公仔麵、即食麵」：「杜汶澤（曾拍攝大快活廣告）可唔可以教我乜嘢係泡麵？」
泡麵喺內地、台灣都常用。大快活發言人解釋，佢哋係用滾水浸泡麵餅，再蓋住嚟奉客，所以叫泡麵，同一般用個煲、滾水煮嘅公仔麵、即食麵，係唔同概念。
食個麵都有概念？文字嘅嘢，費清可能識條鐵，就求助次文化堂社長彭志銘，佢話唔可以話佢（大快活）寫錯餐牌，「但就唔夠親民、本土囉」。
不過，佢話大快活之後解畫，講多錯多，因為喺香港用滾水淥，習慣係叫「沖」，例如沖個杯麵、沖奶茶，「唔會話泡杯奶茶啩」。佢話解釋即係掩飾，更令人懷疑大快活用內地常用詞係媚內。
費清就覺得，中國文字博大精深，真係有排拗，但一個小小嘅「泡」字，凸顯咗中港矛盾依然存在，政府係咪以為整隊青少年軍就可以拆掂？
費清 ＃要生計，也要生活 ＃毋忘初衷