阿仙奴贏曼城贏得清脆俐落，每一位球員都踢出水準。而且最開心嘅，係唔使再單靠阿歷斯山齊士一打十一， 而多咗有「美斯上身」嘅辛迪卡索拉，同埋「銀河唯一基奧特」復出後嘅穩定入球，總算令唔少阿仙奴球迷個心定番。但到底有咩特別嘅改變，令阿仙奴由開季嘅「慌失失奇兵」，變成近來連勝三場兼零失球嘅強隊呢？
我覺得槍手第一個重要改變，就係重用奧斯賓拿。龍門嘅身份好特別，係場上嘅教練，睇到晒所有隊友嘅走位，一個好龍門除咗自己要好波外，指揮隊友都好緊要，奧斯賓拿就可以做到，成個後防表現自然好。
第二點就係重用高基連，講真佢未返阿仙奴之前，對佢真係冇咩認識，但係近三場比賽見佢跑上跑落、助攻助守，令後防前有真正屏障，希望呢位二十三歲球員可以越打越好。
放棄控球改打反擊
第三個改變亦係最重要嘅，就係放棄控球專心打反擊。其實阿仙奴陣中有好多高速球員，但教授就係鍾意「越難越愛」，主張控球，路斯基同奧斯爾夠級數，但兩位傷多過踢，奧斯爾同隊友未夠默契，路斯基就後備居多，令最後控球戰術變成橫傳為主。不過，當雲格（圖）終於肯改打反擊後，陣中快馬同技術型球員都有更多空間去發揮，打得更順下自然有好成績。
今個星期阿仙奴會喺英足盃作客白禮頓，級數當然比對手高，就算對手會以打反擊為主，但面對大勇嘅阿仙奴，應該好難爆冷，我估阿仙奴可以贏2:0。
LULU
不懂踼波愛睇波