長江和黃重組，市場一片讚好之聲，兩者股價立時上升，就係投資者投機者用真金白銀投票嘅證據，並非空口講白話，至於內地官媒在長和重組之後，有揚馬（雲）抑李（嘉誠）之跡象，指馬雲先至係新一代中國商人樣辦，咪由得佢地講囉，馬雲當然係一代商業天才，由一位寂寂無聞嘅英文老師、網站創業者至到成為中國首富，不用二十年時間，認真犀非利。記得左丁山第一次聽到馬雲呢個名字，係在1998至1999年間，昔日同事，崇基校友王幹芝係創業投資專家，常在中國大陸行走，在杭州找到馬雲，係第一批（如果唔係第一個）投資於馬雲身上嘅人，佢講過俾左丁山聽：「我在中國搵到一位天才，奇才，叫做馬雲，你要記住呢個名。」左丁山係記住，但從來冇機會因此而賺到錢呢。馬雲嘅公司以前在香港上過市，成績麻麻，去年阿里巴巴在美國上市，上市價好似88美元，最低跌至82，最高升到120，近日在100美元上下浮動，如果唔識得趁高出貨嘅話，投資回報暫未見出色。
馬雲是否能夠成為李嘉誠咁樣，縱橫全球，聘用中外僱員逾20萬人（三分二係外國人），尚待考驗，李嘉誠創業至今逾六十年，始終與時並進，屹立不倒，投資生意多樣化，多面化，跨國化，管理團隊國際化，但馬雲到目前為止只係有網站而已，所用科技多係美國人發明嘅，如果佢夠膽同步以同方法到美國辦購物網站，不獨在中國稱霸，學人打吓世界波，先至係真本事！
長和重組，係人都知有匯豐做顧問，其實還有美銀美林。「蘋果」報導過，美林阿頭係霍建寧女婿，似有後門之利。唔敢話「蘋果」啱定唔啱，但係人都知霍建寧講價之術極為厲害，和黃若無着數，生意一定做唔成，長和今次重組要由一筆Bridging Loan（過渡貸款）幫小小忙，匯豐固然有大把水借，美林背後嘅美國銀行，當然有過之而無不及，兩大銀行攜手，貸款話咁易，此之謂「資產負債表銀行學」（balance sheet banking），巨型銀行往往可以憑龐大資產，話借就借，從而搶到顧問肥水生意，細間啲銀行，唔恨得咁多咯！