滬港通喺舊年推出，被視為香港股壇大件事。其實以A股嚟講，真係濕濕碎，好小兒科。內地股市今年推出嘅改革措施，可能係近十年最多。除咗滬港通同遲啲嘅深港通外，二月九日將推出股票期權，下半年又行新股註冊制，之後仲有入MSCI，件件都係大動作。成個股壇賽制大兜亂，將會七國咁亂。可以話，港股喺呢個時候用滬港通與A股接軌，真係生不逢時，大幅增加今年股市搵食難度。
以即將推出嘅上證50ETF期權為例，A股玩法又多咗好多新花款。舉例嚟講，中石油、中石化嘅A股成交向來好少，但市值夠大，只要小小籌碼，就可以操縱滬綜指上落，所以經常俾大戶用嚟做造市工具。有咗上證50ETF期權後，呢種情況只會加劇，波幅會大大增加。如果香港股民仲炒呢啲ETF成份股嘅AH差價，就好可能表錯情。因為上面炒賣可能係部署自己嘅大茶飯，同H股完全無關。
香港股市越來越受A股規例影響，上個禮拜，阿爺只係改少少孖展戶口限制，就可以搞到港股喺禮拜一雞毛鴨血。
有戰友話，「連滬港通都睇唔掂，何況仲有N咁多樣嘢殺埋身？」而李小加同志呢個時候又想盡辦法向A股靠近，到時真係亂上加亂！
李可強