周三西班牙盃八強首回合賽事，巴塞隆拿喺主場迎戰馬德里體育會，以1:0險勝先拔頭籌。兩個前利物浦射手蘇亞雷斯同費蘭度托利斯（費托）喺今場波又碰頭，結果一齊敗家。
費托喺上星期十六強次回合威晒，連入兩球幫馬體會以二比二逼和皇馬兼晉級，但佢今場波就回番塘冇乜表現，三十分鐘一次快速反擊左腳施射，俾巴塞守將碧基快一步攔出底線；佢仲有一次快攻跣腳，俾英國傳媒笑佢係向謝拉特「世紀一跌」致敬㖭。費托演出平平，到半場就俾教練施蒙尼換出。
呢邊廂阿蘇更加冇態，教練安歷基今場安排佢踢中鋒，照計應該如魚得水，點知全場只有一次射門，喺三十五分鐘接應拿傑迪錫妙傳，離門六碼無人看管下第一時間左腳勁射高出唔入。其餘時間阿蘇一係掂吓就跌，連為隊友製造機會都做唔到。巴塞成場波進攻都冇乜計，唯有靠死球破僵局；八十五分鐘中場布斯基斯喺禁區被踢跌，美斯主射十二碼雖然被奧比歷撲出，好在成功補射奠勝。下星期次回合會去後者主場再較量過。
費托自從離開咗利物浦之後，喺車路士同AC米蘭都完全踢唔番昔日最佳水準；至於阿蘇今季以天價八千一百萬歐元由紅軍轉投巴塞，好多人都期望佢可以繼續發揮上季英超入三十一球嘅射手本色，雖然助攻唔算少，但至今為巴塞上陣十六場正式比賽只係入五球。教練安歷基賽後都有為阿蘇解畫：「我哋同埋球迷都對蘇亞雷斯充滿信心，佢今日運氣麻麻入唔到波，但成場波我覺得佢表現唔錯噃，喺前面為隊友製造到空位，我好肯定佢好快會再入波。」
美斯補中助巴塞贏馬體會
除咗阿蘇同費托，巴塞王牌美斯喺今場波演出都係一般，雖然夠運補射建功，二○一五年已經入咗六球，但今次亦係佢近七次代表巴塞同埋阿根廷國家隊主射十二碼，第四次宴客。十二碼就一係入一係唔入，更令人擔心嘅係美斯嘅身體情況，佢喺今仗又嘔，據講到𠵱家仲未搵到美斯成日嘔嘅原因。
識睇，一定係睇足英台【英波Live】：
http://soccer.appledaily.com
http://bit.ly/engballlive