喺佔領期間因為撐警而攞到唔少藍絲支持嘅新民黨，本周六（二十四日）搞四周年黨慶。猶記得去年黨慶主席葉劉淑儀致辭時，讀出中聯辦主任張曉明嘅致賀信，奠定「親生女」嘅地位，同「親生仔」民建聯幾乎平起平坐。八方真係好想知，今年喺九龍灣展貿搞嘅黨慶，仲有冇京官致函讚新民黨反佔中得力呢？話時話，佢哋呢次黨慶好大規模，除咗特首、三司同一眾局長排隊到賀，據知佢哋筵開九十幾席，多過民建聯舊年籌款晚會嘅六十幾席！而喺下周六（三十日），佢哋就會喺屯門黃金海岸搞集思會，主題係今年發展大計，相信都係年底嘅區議會選舉。該黨同公民力量結盟後，區選「人才濟濟」，據知今屆有約四十人落場，矢言同泛民打一場硬仗。