呢個世界，邊會有無緣無故嘅恨㗎！花生友點解有此感嘆，無非因為前日立法會大會流會後，唔少建制派冇將矛頭指向缺席嘅議員身上，反而呢，覺得主持大會嘅主席曾鈺成，冇執到正喺十點鐘就散會，先係流會罪魁禍首。冰封三尺非一日之寒，建制派對曾鈺成嘅怨恨，點只流會咁簡單？
自從曾鈺成做咗立法會主席後，開始流失建制派嘅歡心。花生友四出打探過，發現呢個轉變唔係源於佢掌管立法會後大鼻咗，相反係因為佢要保持中立，同泛民越傾越埋，有人開始覺得好礙眼，偏幫泛民之聲亦湧現。
有建制派話阿曾為咗保持中立，咁樣做原本冇乜問題，至弊當佢決定明年完成任期、唔再爭取連任後，可能因為冇晒包袱，結果越講越奔放，似乎冇理到自己仲係建制派，仲舉例指，有樣嘢至今令建制派耿耿於懷，「你唔記得，我哋呢頭反拉布，佢（曾）嗰頭就讚拉布議員發言好專業咩？」哦，原來心裏面都有條刺，難怪咁多嘢都睇唔順眼。
但花生友相信，建制派呢鋪怪阿曾，唔係太關舊怨事嘅。據知佢哋普遍認為，明知都唔夠議員在席啦，仲乜阿曾要堅持要完成埋嗰項議程，先肯暫停個會呢？除非……阿曾別有用心，想市民知道邊啲議員唔盡責開會開到尾囉。誰是誰非都好，會已流、人已鬧，花生亦剝夠。
花生友