應徵過model、似乎幾享受鎂光燈嘅特首之女梁齊昕，噚晚着咗條紅色連身裙加仿皮草褸出席會展舉行嘅上海灘時裝表演，一到場就俾記者叫停要求影相，佢欣然答應並大擺甫士搔首弄姿，任影足足約十分鐘，其間除外套時唔小心露出黑bra帶，但見佢全程表現淡定，都幾有晉身演藝界潛力。
齊昕受訪時話係首次出席同類活動，自己有興趣睇騷多過做模特兒，但假如有人邀請行catwalk都會禮貌應承：「不過要睇吓佢哋搵我做乜，內衣騷就唔會嘞，如果係泳衣騷睇吓係咪one-piece（一件頭）定其他程度。」至於拍廣告，佢亦會考慮，主要睇吓邊類型廣告。
父母梁振英同唐青儀鍾唔意鍾㗎？齊昕話唔怕，但承認父母想自己低調。咁佢近日頻頻接受傳媒訪問，父母有冇意見？佢話：「唔知，冇乜同佢哋溝通。」相信父母有睇報道。
我行我素嘅齊昕，繼續接受傳媒訪問訴心聲。佢最近接受《HK Magazine》訪問，話父母管教好嚴，試過凌晨十二點半，七次錯過梁振英來電，佢話老竇永遠唔會讚自己嘅仔女，但曾經話佢係三個仔女中最聰明。
計劃禮賓府搞狗酒店
至於同阿媽梁唐青儀，齊昕話兩母女嘅關係非常複雜，兩個人都好「aggressive（好鬥）」，阿媽鍾意表露出嚟，佢就經常唔出聲。齊昕仲話當年若留喺香港而唔係去外國留學就唔會咁反叛，為父母惹少好多麻煩。
齊昕噚日仲喺facebook公佈生意大計，索價五千蚊，俾人送狗去禮賓府陪佢同床瞓一晚。特首辦至截稿未回應齊昕呢壇生意搞唔搞得成。
李八方
mailto:[email protected]
