逢周五，咖喱牛腩都會跟大家暢談球壇的人和事。既會嘻笑怒罵，寫出激情，亦會冷靜分析，寫出理性。
呢排睇曼聯啲波，真係幾冇癮，無論對伊奧維，定係對修咸頓，曼聯都好似唔識組織，唔識攻門咁，成班喺中場搓嚟搓去。小弟仲以為足球改咗例，變咗做多控球嗰隊贏。
曼聯之所以咁悶，因為雲高爾出嗰班正選冇火花，功能重叠，位置錯晒。迪馬利亞（圖）上季喺皇馬踢得最好嘅係box to box中場，佢需要喺後少少嘅位置，先有空間突破，但𠵱家雲高爾將迪馬當成荷蘭嘅洛賓咁用，搞到迪馬成日俾班大隻佬中堅、防中圍住，冇位去突破。
雲高爾好鍾意用桑馬達加朗尼踢中場，佢哋最強嘅係入楔同射門能力，但受壓迫下嘅創造力唔強，佢兩個都係影子前鋒嘅最佳人選。最弊嘅仲係，佢兩個防守根本唔合格。由呢幾場波睇到，朗尼同桑馬達功能重叠，應該出其中一個就夠；佢兩個拍檔中場，只會係一加一少於二。朗尼應該踢番影子前鋒個位，迪馬利亞就落番嚟踢中場，同卡域克、費蘭尼打中場。
另外，中堅傳球能力弱，搞到卡域克成日墮得太後，令後場同前場之間嘅距離太大，有時桑馬達或朗尼返後攞波，都會變得孤立無援。講完一大輪，小弟都只係雲高爾口中嘅六億份之一。雲高爾，雖然你聽唔到咁多球迷嘅意見，但你應該估到大家想要一支點嘅曼聯。
文：咖喱