曾經唱內地版《魔雪奇緣》（Frozen）主題曲嘅內地歌手姚貝娜，上周五因乳腺癌復發病逝，終年三十三歲。喺姚貝娜離世嗰日，內地《深圳晚報》（下稱《深晚》）竟派咗三個記者假扮醫護人員，潛入殮房拍攝姚貝娜遺體，兼且拍攝姚貝娜捐獻眼角膜嘅過程，呢件事引起咗內地輿論嘅關注，網上仲有唔少網民都留言譴責。
雖然《深晚》日前曾公開道歉，但噚日又發出咗一篇社論、一篇聲明以及一篇以《姚貝娜眼角膜捐獻：臨時手術室裏到底發生了甚麼？》嘅文章作出回應，反擊番連日嚟外界嘅抨擊，佢哋仲話會保留法律追究嘅權利，向相關人員追究法律責任。
矛盾多多
文中仲話呢個輿論風暴發生以來，佢哋一直保持沉默，無非都係希望安靜咁為姚貝娜致哀，選擇喺噚日發聲，並唔係想再掀起任何風波，只係希望還原現場同披露事實，令事件平息。《深晚》強調當日記者冇着白袍扮醫生、冇偷拍遺體、冇高呼新聞自由，甚至亦都冇推跌姚媽媽。
但係《深晚》披露嘅所謂真相，都有好多矛盾嘅地方，好似記者話喺走廊見到眼科醫生姚曉明拎住好多嘢，所以先幫佢拎去手術室，如果醫生同家屬想佢哋迴避，佢哋一定會出去，但係姚曉明喺另一個訪問度話，佢係喺知情嘅情況下，畀記者拍攝摘取眼角膜手術，並非記者所講喺走廊偶遇，查實呢件事誰是誰非真係好難判斷，希望件事快啲平息！
撰文：馮仁昭