好多網民都話亞視已經爛到無藥可救，冇好節目不特止，仲要不斷重播又重播，所以倒不如趁住家陣財困順勢摺埋佢。不過，作為亞視前老闆邱德根嘅孻仔邱達根（Duncan）就話有條好橋可令亞視起死回生。
華華噚日喺一個券商活動撞到Duncan，當然要問佢哋家族有冇興趣買番亞視，話晒佢阿爸主政時嘅亞視都輝煌過，仲有錢賺㖭。
Duncan就話唔知家族有冇興趣番兜亞視，但佢就反問華華：「亞視仲有得做咩？」話音未落，佢自問自答話「有得做，將ATV個T字拎走咪有得做囉」。然後就笑笑口就走咗。咁其實佢想叫亞視改播AV（成人影片），還是改行賣AV（影音）產品呢？
雖然拍《金雞》系列嘅吳君如𠵱家趕拍套《12金鴨》，有成人題材嘅戲應該好受歡迎，但喺亞視播啲咁重口味嘅嘢，唔好話通訊局唔畀，一班師奶觀眾（如果亞視仲有觀眾）一定狂寫信投訴。