香港有美食天堂稱號，向來鍾意飲飲食食兼開埋餐廳嘅旅發局主席林建岳，噚日帶隊去台灣推銷香港，以秘密武器打響名堂，咪就係福臨門嘅招牌菜式大紅燒乳豬囉！八方聽聞，隨團嘅福臨門主廚張錦懷唔介意台灣廚師偷師，先令台北W酒店借出燒豬爐畀佢當眾獻技。
福臨門除咗攞到米芝蓮一星，仲獲英國知名雜誌《Restaurant Magazine》評選為亞洲五十最佳餐廳。岳少噚日率領十五個本港旅遊界人士去台灣推廣香港旅遊同美食，就拍膊頭請咗福臨門主廚張錦懷帶住大紅燒乳豬首度登台，幫佢哋預備開年飯。
當地廚師觀摩學嘢
由於福臨門燒乳豬超級出名，一日賣成二、三十隻，所以當張師傅來台消息傳出，好多當地廚師都想學吓嘢，尤其燒乳豬嘅醬料調配同火候，最考師傅功力。
八方聽聞，台灣W酒店肯借出燒爐，條件就係當地嘅廚師可以出席觀摩，好在張師傅唔介意燒乳豬秘技外傳，促成呢件美事。最終仲燒咗成十四隻乳豬，大家都食唔停。唔知會唔會吸引到更多台灣人因為食乳豬而嚟香港呢？