人稱皇上嘅熱血公民黃洋達去年六月反東北示威衝擊立法會，案件原定去年十一月廿四日開審，但最終押後一日先開到單案。案件上周四裁決，裁定皇上非法集結罪成罰款五千蚊，控方當時話會向代表佢嘅林偉展、黎志超律師事務所追討堂費，點解律師樓要上身、皇上就唔使孭？律師樓噚日派咗個女律師上庭解畫。女律師話有職員舊年六月收妥證物，但將證物擺埋一邊，八月離職時又冇同其他同事交代，令律師樓以為冇收過證物。原定開審時辯方就基於冇收過證物申請延一日開審。裁判官話涉案證物包括皇上嘅會面記錄同多段現場錄像片段，欠缺證物可能影響辯方準備工作，仲話可將本案轉交律師會跟進，最終只係頒令律師樓畀九千蚊堂費。