【一路向北】人人都話返內地拍劇賺錢好容易，在娛樂圈消失了一陣子的李逸朗（Don），二○○九年與英皇唱片滿約後，膽粗粗拿着二萬多元「身家」隻身赴北京打拼。不過世事豈能盡如人意，Don日前受訪大爆返內地拍劇辛酸，他曾自製個人資料派給劇組人員𢱑撈，又試過游臭屎河，最霉時候還要寄住朋友家瞓L形梳化……但Don依然撐得住說：「我離開屋企冇養家出嚟打拼，憑乜食好住好吖！」
撰文：王連連
現年三十二歲的李逸朗在香港發展時，雖未算大紅大紫，但曾拍電視劇、還出過幾張唱片；沒想過離開英皇後，一個人返內地發展凡事要力親為。Don日前在尖沙嘴接受訪問時，直言初時不懂從何入手，他說：「記得第一次去北京一間平價酒店入面面試，唔同劇有成廿幾組人喺度，畀演員送資料過去。但我完全唔知要放低個人資料，之後就自製咗一份有六、七頁紙嘅自我介紹，一次過印咗二百份走去派，呢個係我嘅開始。」派資料派足大半年，Don終於等到第一個機會，拍《張小五的春天》做男二號，Don說：「我算好運，套戲喺央視一台播，反應好好，全國播咗好多次，畀機會我打開內地巿場。」
天寒地凍游冷河
Don稱香港演員到內地發展，並非如外間想像般無限風光，有時都要吃點苦頭，他記得二○一○年拍張智霖主演的《終結杉計劃》，捱完冰冷河水，又要游臭屎河，Don說：「其中一場戲我要孭住支槍游過條河。嗰時喺十二月，天氣好凍，導演問我要唔要用替身，我一口就答話『不用』。嗰時我用保鮮紙包住個身嚟保暖，但因為要拍特寫鏡頭，唔可以用木槍代替，一路游一路沉底，墜到我個人都游唔郁，好似遇溺咁。」
兩年瞓彎梳化床
Don擔心自己表現不濟，當導演要求他游臭屎河，Don都不敢拒絕：「嗰條河喺橫店好出名，兩邊有公廁，可能有啲嘢（排洩物）流出嚟。我攞出勇氣落去游，游完真係想喊，因為上水後成個人都好臭，𠵱家諗起都覺得臭。咁啱附近有一張劉亦菲着古裝衫喺河上面吊威吔飛過嘅相，嗰刻真係好想同導演講條河係用來飛，唔係游㗎。」Don直言重頭再來，未必有這樣的勇氣。也因為香港跟北京天氣有別，其間一度患病，他說：「有段時間我隻手舉唔起，睇中醫要針灸，話南方人去到北方好易有關節炎。」
長居北京的Don，衣食住行通通都要自己支付，他透露最初只有能力租住約一百八十元人民幣的賓館，後來為慳錢更寄居朋友家，他說：「有啲比我早去發展嘅香港朋友，同佢哋坦白講我唔掂，佢哋就留咗張L形嘅七人梳化畀我，一瞓就瞓咗兩年幾，張梳化由直板俾我瞓到U字形。」
由於當時身無分文，Don更怕回香港見朋友，他解釋：「怕遇到後輩要派利是嘛，寧願留喺北京進修吓。」他現在的經濟環境較以前好，已搬離朋友家獨居，搬往月租五千元人民幣的七百呎新居，他笑說：「𠵱家屋苑樓下有人工湖，仲有錢買架單車代步。」Don現在不再追求名牌靚衫，只追求心靈快樂，他笑謂：「唔要喇！其實環境好、食住好，咪又係一個皮囊，我離開屋企冇養家出嚟打拼，憑乜食好住好吖？以前間中會喺朋友衣櫃攞衫嚟着，所以搬屋時行李都唔多，一個大膠箱拉住就走。」真的很瀟灑！
