唔知係咪同個別泛民食過餐飯，搞到政務司司長林鄭月娥對通過政改嘅信心都高咗？佢噚日出席新界各界政改論壇發言時話，自己嘅信心大過政制及內地事務局局長譚志源，「譚局長話政改通過嘅機會係零，但我就好啲，我都係話未許樂觀啫」。譚志源笑笑口話如果政改通過，承諾公開唱歌畀大家聽。副局長劉江華今次有得出聲喇，佢話乜嘢係真普選呢？就係有得投票就係真，冇得投票嘅話，講乜嘢都係假。
呢場喺大埔一間中學舉行嘅研討會聲稱七百人出席，主要由建制同鄉紳政團動員，全場和聲連連、零反對聲音，唔少公公婆婆聽聽吓瞓着覺。完場時至少四五架旅遊巴接啲出席者去唔同地方，認真窩心。