年底通常係飲宴旺季，費清前排都去咗幾個朋友嘅wedding，擺低人情梗係都想擦餐勁兼影相，但千祈咪以為，有大會攝影師幫你影張靚相係必然喎，有冇諗過，現場啲攝錄器材一旦唔見晒，在場嘅新人同賓客，可以點樣繼續笑住過？
費清唔係先天下之憂而憂，查實係因為有日喺婚宴上，撞到個好耐冇見嘅朋友，佢專做婚宴攝影，大呻近月行內好慘，喺各大酒店嘅婚宴場地，都有攝錄器材，包括相機、鏡頭、手提電腦等不翼而飛嘅事件，行家報警都冇用，基本上係搵唔返。
#朝早儀式相片冇晒
佢哋行內認定係有小偷有目的咁出擊，擸走貴重器材，相信唔關賓客事。失機事小、失相事大，佢引述有個行家影影吓相突然發現唔見咗其中一部相機，當中有一對新人朝早儀式嘅相，咁啱冇備份，激到新人紮紮跳，幾乎要跪玻璃咁滯呀陰功。
婚宴偷機賊近期係咪大增？據知警方係冇呢婚宴盜竊罪分類，冇數字提供。費清問過婚禮顧問歐惠芳，佢一聽以上事件就話：「嘩！唔見咗新人啲相咁大件事？」佢話過往不時聽到有攝影師喺婚宴唔見腳架、鏡頭同手提電腦，「但最多唔見嘅係手提電話」。
歐惠芳話若果有人潛入婚宴偷嘢，其實防不勝防，惟有成個攝製團隊同工作人員守望相助。佢提醒業界要為器材買保險，要用USB為相備份；一旦咁唔好彩唔見嘢，除咗報警，應該即時翻睇現場嘅CCTV嘗試緝兇。
費清 ＃要生計，也要生活 ＃毋忘初衷