電視都有教，如果遇到突發事件，要發出震撼性嘅聲音，先可避免人踩人。港交所（388）話引入停板機制。我就咁睇，停板就好似你遇到意外時，你叫救命，叫得細聲，咁咪即係冇用囉！
首先，短時間內大幅波動嘅股份通常都係二三線股。買得呢類股份，唔通貪佢穩陣？當然係貪佢夠刺激。投資者本身就預咗隻股大上大落，無必要由港交所充當慈母去保護。再講，機制話要畀投資者冷靜，但分分鐘適得其反，令散戶落錯決定！假設市場突然爆單重大消息，全世界都知，咁咪由得市場反映隻股嘅價值囉，點解唔相信市場？唔信市場就唔好學人炒股啦！股價反映唔到應有價值，咁仲有咩意思？
假如有隻股，喺成條街冇人知咩事情況急跌，冇停板情況下，最多只係恐慌性拋售一隻股。不過新機制下，投資者見到呢隻股跌停，啲錢鎖死喺一隻股，走又走唔到，最慘係市場冇消息，咁或會令投資者轉移目光去同板塊嘅股份「沽住先」，引起連鎖反應，令其他股被搭沉船。而且五分鐘可以發生嘅事好多，冷靜期反而畀多個機會春江鴨搵食。更重要係，近年港股質素下降不容置疑，相信唔少人對港股信心越來越低。大家對市場信心本身不足，但港交所又加大限制，只會令人更加冇癮。
Fifi
本欄逢周二、四刊出
http://www.facebook.com/lovefrystock