踏入二○一五年半個月多啲之嘛，立法會已經流會嘞，有啲建制派就將流會嘅問題，怪罪喺立法會主席曾鈺成身上！話說噚日嘅大會原定開到晚上十點就要停，但曾主席覺得，既然開始討論緊保險界代表陳健波提出、有關打擊保險詐騙活動嘅動議辯論，不如表決埋呢項議程，以便今日續會開新議程。
其實建制派議員已經有啲不滿，覺得唔一定要完成成個表決啫，但都無奈地接受主席決定。點知喺約近晚上十點半、要表決工黨李卓人提出嘅修訂案時，李卓人突然提出記名表決，立法會咪即刻響鐘call人囉。
喺深水灣鄉村俱樂部同家人食緊飯嘅田北辰，一知響鐘都飛的趕返立法會，可惜佢最後一分鐘趕返議事廳，亦救亡失敗，響咗十五分鐘，都係唔夠法定嘅卅五人，仲差兩個人先夠數，結果流會告終，下周三再開會。