尚記得萬達老闆王健林，早年與阿里巴巴馬雲設下十億元賭局，賭網購十年內能否攻下零售市場半壁江山。當時王健林高呼「傳統零售不死」，認為商場仍大有可為。
口裏說不，身體卻很誠實。集團近年在電商領域大舉投資，就連上市不足一個月的萬達商業（3699）最近都轉型，把二十個商場的業權賣出去，只負責興建和營運。作為全國最大商業地產商，話自己唔想再擁有新商場的業權，咁反映咗啲咩？斷估唔會係「對行業前景充滿信心」吧？
萬達形容，是次合作為「輕資產模式」（asset-light model），未來會朝這方向轉型。所謂輕資產，多用於品牌身上，最為人熟悉的有Nike：沒自家廠房，大部份店舖是特許經營。
但對於一隻地產股來講，說自己是「輕資產」就有啲搞笑，事關地產股估值，從來就係睇佢的資產有幾多，睇NAV多過睇PE，萬達反其道而行，咁投資者以後是否應轉model去分析公司？百貨和酒店業都有主打做管理的企業，但前提是你必須擁有卓越的管理能力，走精細化經營，這向來是外資和港商的強項，而唔係靠錢多。萬達這方面明顯唔擅長。
無論點轉型，萬達太多關連交易、租金回報過低等問題，遲早都要解決。是次減磅可能減輕財務壓力，但唔代表輕資產模式真係work。
海迪