上兩星期渣打證券突然結束全球企業證券業務，香港裁咗成百人，好多人都係朝早返到中環國金二期辦公室，拍卡先知入唔到門口。成件事好突然，亦好無奈，是次行動乃因集團業績倒退要節約成本，所以將成個部門鏟起，同員工表現無關，被裁都係非戰之罪。華華聽聞，當中一位被裁渣打人，乃金管局總裁陳德霖（Norman）阿仔Gerald。
陳德霖都做過渣打
陳總有一子一女，佢私事一向作風都低調，甚少喺公眾面前展示全家福。據講，Gerald喺英國讀完大學後，就回港工作，大約兩年幾前加盟渣打證券。渣打發言人話，不會評論個別員工事宜。
無獨有偶，Norman亦曾經喺渣打做過。二○○五年五月，佢突然中年退修，離開金管局，輾轉喺二○○五年年底，加盟渣打集團，做亞洲區副主席，大約兩年後離開，出任特首辦主任，直至二○○九年十月，接替退休嘅任志剛，坐正做金管局總裁一職。
其實證券行、投行裁員經常發生，好似二○一三年初，大摩亞太區瘦身，時任大摩經濟師嘅任總千金Denise，坊間都傳聞「被離職」。