呢期要數最紅嘅名人係邊個？相信觀塘區議會主席陳振彬必入三甲，作為青年事務委員會主席嘅佢一句：「大學生畢業後就申請公屋，係放棄自己」，即刻打響知名度。未幾又成為被視為解放軍少年制服團體嘅「香港青少年軍總會」主席，風頭可謂一時無兩。人紅自然多人搵，點知卻令陳振彬招惹無妄之災。
整傷盆骨 跌爛手機
話說啱啱過咗嘅星期日，香港青少年軍總會舉行成立典禮，謝絕大部份傳媒採訪，神秘之餘，詳情欠奉，傳媒自然連日一窩蜂打畀陳振彬問個究竟。陳振彬話喎，原來佢周一晚忙於接聽電話之際，一唔小心喺樓梯仆倒，最終整傷盆骨兼跌爛手機。傷身事小，最重要係佢當晚冇電話用，好似潛咗水咁，令傳媒搵極都搵唔到佢。
八方噚日搵陳振彬再深入了解青少年軍詳情時，順道慰問一吓呢位受咗傷嘅主席。佢多謝八方關心，𠵱家除咗有啲瘀傷外，最大問題係雙手冇力，「雙手不但舉唔起，連揸筷子都冇力」，而盆骨呢家嘢一旦傷咗，可大可小，分分鐘會影響四肢活動能力，所以佢已經預約專科進行詳細檢查。雖然一為青少年軍監誓，即刻變成咗傷兵，八方相信，身為青少年軍總司令嘅特首夫人梁唐青儀，唔會咁易放棄佢嘅，八方在此祝佢早日康復。
李八方
mailto:[email protected]