韋達、潘頓同柏寶三件資深過江龍包辦頭三場頭馬，到第四場四班一千米輪到華將威番次，吳嘉晉幫前師傅葉楚航埋齋起孖，個人亦告連贏兩期。今場吳嘉晉騎新勝馬「勝任如意」一檔起步，做番晒佢應該做嘅嘢，順利出閘搶前貼欄順放，就咁無驚無險帶返終點，幫此駒以3.4倍大熱身份完成連捷，亦成為葉楚航繼第二場「慷慨寶」後呢晚第二win，令佢開季四個月首度起孖，做番齣好戲！
呢晚頭馬暫時全部走內欄，外叠馬衝來衝去頂多都係P，好似今場一對落飛馬「名馬」同「創出商機」，後上分別只得第二、三名，對「勝任如意」構成唔到實質威脅，第四名則由冷門「綠茵風采」取得。
「勝任如意」係葉廐今季首匹谷戰連捷馬，馬主新秀團體由多位城中有成就之女士組成，例如前高官劉吳惠蘭、俞宗怡等，而另一成員袁轉好就係行政會議召集人林煥光太太。呢晚未見劉吳惠蘭、俞宗怡出現，但林煥光卻罕有地入場為太太愛駒打氣，結果兩夫婦一起拉頭馬，都算值得紀念。