警方喺佔領運動期間唔少手法都惹爭議，但同時亦有唔少市民狂畀like。當人民力量陳偉業噚日喺立法會批評警方用警棍擊打示威者「發洩」，詢問保安局局長黎棟國（圖）到底有冇加強培訓「慈母」警員情緒控制時，黎棟國唔太認同陳偉業嘅意見，反指社會上好多人對警方執法態度係予以肯定，而警隊收到嘅支持信同電郵，更加係史無前例地多，仲有人親身去警署表揚警員㖭呀。不過佢都話喎，任何有關警隊嘅表現評價，都會虛心聆聽，重申警隊會依法維持社會安寧。
黎棟國仲透露，旺角等地區早前出現嘅「鳩嗚」，已有三百二十人因拒捕、公眾地方行為不檢等罪被捕，又代其他市民訴心聲，話有關行動對其他道路使用者帶來騷擾，商戶為怕受長期滋擾仲「敢怒不敢言」喎。