呢排英超球證不停俾人鬧成日判錯，呢啲爭議場面去到英格蘭聯賽盃都大把有得睇。周二英聯盃四強首回合，利物浦喺主場佔盡優勢但只係以1:1逼和車路士，球證艾堅遜喺幾次爭議情況都當睇唔到冇吹；其中泰利當正自己玩緊摔角咁，出超必「無敵風火輪」將史達寧夾住，艾堅遜都當冇事行過就算，係咪盲成咁？
史達寧單騎救主
賽前利物浦已經連續八場未輸過，周二迎戰車路士亦佔盡優勢，全場有十九次射門；車路士只係兩射一中，不過輸形勢偏偏就先入波。十八分鐘車路士第一次正式攻勢，夏薩特喺禁區被安利簡恩侵犯，十二碼由佢親自操刀搞掂。之後形勢一路都仲係紅軍佔優，下半場頭十分鐘比賽，利物浦嘅控球比率高到去八成，終於喺五十九分鐘扳平，史達寧由半場附近單騎直進，逢人過人殺入禁區射入，以呢球靚波扳平。六十八分鐘紅軍幾乎反超前，隊長謝拉特離門十五碼左腳熨射可惜中柱彈出，結果首回合各一言和，次回合返車路士主場再鬥過。
紅軍今場贏唔到除咗爭啲運氣之外，似乎球證艾堅遜都幫到啲手。上半場補時嘅時候，車路士前鋒迪亞高哥斯達喺自己禁區度坐喺地下明顯犯手球，但艾堅遜都冇判；更離譜係喺五十四分鐘，泰利喺禁區頂同史達寧相撞，之後順勢碌落地用雙腳夾住佢，好似摔角招式咁箍實史達寧。艾堅遜行過拍一拍泰利就走咗去。相比之下，之後車仔門將泰拔高圖爾斯疑似出迎飛出禁區犯手球已經好小事，艾堅遜梗係唔吹喇。
摩佬牙擦抽林伯水
紅軍主帥羅渣士賽後都覺得贏唔到好唔抵：「我哋今場波表現咁好都贏唔到，相信車仔都認同佢哋和波已經收晒貨。」羅渣士講到球證執法更加咬牙切齒：「今場更唔抵嘅係我哋應該至少有一球十二碼，迪亞高哥斯達明顯有手球，之後對方門將都肯定係出咗禁區犯手球。」
車路士下場返主場踢次回合，晉級形勢大好，摩連奴賽後仲借謝拉特寸吓曼城同林柏特：「以謝拉特質素實在唔應該離開英超，我係咪應該去借佢返嚟呢？」
識睇，一定係睇足英台【英波Live】：
http://soccer.appledaily.com
http://bit.ly/engballlive