呢日睇到統計署統計月刊（2015年1月）嘅一篇特別報告：1991年至2013年香港的結婚及離婚趨勢──幾有趣味。講開又講，好似大約兩年前啩，統計署不再印行統計月刊，要睇就要上網，對左丁山十分不方便，以前每隔兩三個月就買一本，書架上積存1950年前至到2012年左右嘅香港統計年刊、月刊，查舊料比較容易，依家政府大概為咗慳錢及所謂環保，不再印行發售月刊，實在係剝奪納稅人知情權。政府每年無無謂謂派糖數以億元計，點解每個月印刷一兩千本統計月刊就要慳番？蝕得幾多呀？成立一億九千萬元青年發展基金咪又係丟錢落海！借錢俾青年人創業喎，蝕清光之後，青年人有何本事還錢？拉佢地去坐監呀，特區政府夠膽兼忍心乎？
1991年，全港有6295宗離婚，平均每日17.2宗，到咗2013年，全港離婚案件有22271宗，平均每日61宗，上升咗3.5倍，粗離婚率（crude divorce rate）就由1991年係每一千人有1.11（等於0.11%），到咗2013年，粗離婚率升到3.1，而且係持續上升，雖然並非一條直線上升。統計署分析，按學歷分，較低學歷男女離婚／分居比例在過去20年大幅度上升，例如2011年小學程度以下嘅男性離婚率達到6.8%，比1991年增加超過六倍，而女性45-49歲小學程度人士嘅離婚率更由1991嘅1.8%升至2011年嘅10.2%。
淨係睇年齡組別嘅話，45-54歲原來係危險十年，呢個年齡組合嘅離婚率，無論男女具備甚麼教育程度，都位於前列，假設30歲結婚，婚後10至20年，就比較可能日久生變，或有第三者，或互相討厭，或因生活不前而生怨憤，於是相嗌唔好口，離婚／分居收場。當然以上純屬猜測，大學嘅社會學、心理學家最好利用呢啲資料，作深入分析，會對香港社會有貢獻。左丁山之所以慢慢睇離婚資料，要多謝記者G，佢知道政府有此統計數字之後，特登下載打印共13頁紙俾左丁山，如果喺上網睇，會眼花㗎。睇完去飲茶，與律師C同席，講起離婚，佢話初入行時，最出名離婚律師係羅顯勝法官嘅千金羅海倫（兩人均已作古），法庭只會在星期六早上處理離婚案，一朝就全部處理完畢。依家呢，唉，好唔得掂，平均每星期有四百幾宗，法庭審到氣咳，專打離婚案嘅律師就荷包脹卜卜。離婚案在香港睇嚟有增無減，律師唔怕冇嘢做。