頭三場由三大猛將各建一功，順序係韋達、潘頓同柏寶，搞到雷神斯人獨憔悴。
第三場四班一哩，柏寶夥拍方廐「騏名燈」攝內欄上，學足潘頓贏「慷慨寶」咁，結果畀佢倒模成功，3.7倍「騏名燈」增程同樣大熱開齋，方嘉柏守齋四個賽日被大摩拋開三win後終於作出反擊，而且係佢2015年谷草首捷，馬房算做走出低潮。
今場拉士幾隻追一隻，當中田泰安騎蔡廐39倍冷門「勝利威」如狼似虎殺上，差兩步僅僅追唔到「騏名燈」屈居亞軍，四歲馬服役首度上名。而三、四名「過關勇將」同「勁飛揚」都係冷門，四重彩大熱行頭，都派接近四十四萬元，十分和味。
「騏名燈」之前一直跑一千、千二米，次次追唔切齋近，明顯短途唔係佢杯茶，今勻加程首戰中距離，同父馬「百勝不厭」、「常勝多」等都係贏千四米甚至更長途程。結果「騏名燈」冇令方嘉柏跌眼鏡，順利開齋。至於「勁飛揚」夾正呂健威五十六歲牛一前夕復出，落班力拼，可惜只得梗頸四。