雖然花名叫做「唔揪得」，但身兼港區人大代表嘅工聯會理事長吳秋北，呢排卻極之揪得，因為倡議國安法適用於香港，勇武舉動令佢聲名大噪，亦令身兼港區人大代表召集人嘅馬逢國（圖）翻閹立法會後兩年幾以來，首次喺立法會主動行埋咪兜解畫。
馬逢國話喎，由於吳秋北嗰啲係個人而非整體港區人大嘅意見，自己身為召集人，有必要主動澄清，等外界唔好誤會，所以前日破天荒地行去咪兜自動獻身。但佢話事發後唔敢搵秋北，以免搵佢了解會有施壓之嫌。
港區人大代表下周就有例會，相信屆時肯定會講國安法；面對人大之間為此撕裂，馬逢國話大家有唔同意見好正常，絕對不認同吳秋北嘅意見係「不知所謂」。