特區政府日前突然主動撤回立法會財務委員會嘅幾項議程，無非係要讓路畀特首梁振英提出嘅創新及科技局撥款，以免今個財政年度過唔到，又要推倒重來。雖然話就話政府此舉好突然，但建制派一早就收到風，大鑼大鼓支持「打尖」決定，無非係想打一場反拉布民意戰。花生友聽聞政府咁勇武，亦因為就連泛民對創科局都唔係一面倒反對，所以諗住硬碰硬，睇吓邊個企得更硬。
查實人民力量一早講明，會用拉布形式拉冧創科局，仲想睇吓其他泛民會唔會配合。但花生友聽聞，情況一如政府所料，會為此拉布嘅泛民唔多，身為資訊科技界代表嘅莫乃光，更加會喺呢單嘢上企喺政府嗰一方，佢話會同泛民講，唔好阻止創科局成立，因為業界爭取咗好耐，憶述當年殺資訊科技及廣播局，佢同白鴿黨單仲偕都有拉banner抗議啦！
到底莫乃光游說戰係咪成功，大家只能拭目以待，但建制派肯定全力為政府護航。民建聯葉國謙話呀，政府調動議程前有知會佢哋架，政府唔可以一路捱打，惟有咁做啦，強調呢次都係打場民意戰，咪睇吓市民到底係咪支持咁樣拉布法囉。
身為財委會主席嘅張宇人就覺得政府咁趕，因為最遲要喺二月十四日前通過到，因為預算案下月二十五日公佈，要預時間印刷，如果過咗要加埋問開位嘅預算，如果過唔到，要再上一條新嘅決議案，更改生效日期，屆時就要再上大會同財會多一轉。
花生友