今時今日，坐飛機閒過立秋，大家上飛機嘅衣着亦十分隨便，好多時都會喺飛機上面見到着住短褲、拖鞋嘅後生女，即使頭等、商務艙，男女乘客多數只係Smart casual，但原來N年前坐頭等艙嘅男乘客係規定要着西裝、打領呔㗎。
國泰航空（293）新一期內部刊物《國泰天地》，搵來為國泰打工超過四十二年、上月先退休嘅儀容顧問林愛華話當年，林愛華早於一九七二年加入國泰，最初做空姐。
林愛華憶述，當年國泰只得九架飛機，機艙好細，一架飛機大約九十個經濟位同少量頭等位，乘客都係打扮端莊，正襟危坐。佢又提到，頭等艙嘅男乘客必須着西裝、打領帶，而空姐就會用銀餐具，喺乘客座位旁邊切羊扒同牛扒招待，似係去半島酒店餐廳食飯咁話。