阿里巴巴創辦人馬雲出名曝光率高，正當大家以為阿里喺美國上市後，佢會休息一下低調番少少，殊不知佢呢期同政治高官越行越近，除咗陪同國務院總理李克強，飛去瑞士達沃斯出席世界經濟論壇年會，早兩日又搵到國務院副總理汪洋去參觀淘寶村，唔通部署緊其他大茶飯？
汪洋同馬雲探訪嘅淘寶村，位於浙江臨安白牛村，係中國四大淘寶村之一。唔講唔知，要成為淘寶村，活躍網店數量要達到當地家庭戶數一成以上，每年電子商務交易額要超過一千萬人仔，截至舊年，全中國已經有二百一十二條淘寶村，擁有淘寶村最多嘅省分，三甲係浙江、廣東同福建。
查實馬雲一向好識得同高官做朋友，上年七月就陪同國家主席習近平到訪韓國，阿里董事局又搵到香港前特首董建華坐鎮，呢位中國首富真係唔簡單呀！