𠵱家唔止月餅要飛甩老土，銀行都要咁做。有超過六十年歷史嘅上海商業銀行最近將銅鑼灣一間分行翻新，仲專登聘請一名年輕貌美嘅e-ambassador駐場，幫助一班老顧客使用銀行服務。
呢間分行有兩個重點，首先係一塊巨型互動屏幕，可以睇世界各地天氣、check滙價、股價、定存息率等等。第二樣咪就係呢位親善大使Annie囉，佢啱啱喺大學畢業，就加入上商，返工一個月。
點解要專登請後生靚女駐場？管理層話怕啲老顧客驚㩒爛啲嘢，唔肯用呢塊屏幕，所以就派出呢位靚女充當親善大使，教班客仔試用高科技嘢喎！
聽聞呢間分行裝修費五百萬有找，管理層計劃繼續物色地方夠大嘅分行去改變形象。咪即係會再請多啲靚女親善大使？都話靚女幾時都咁多人鍾意㗎喇。