今屆澳洲網球公開賽喺前日開波，天氣預報話今年墨爾本唔會好似舊年咁熱，吓吓上到攝氏四十度，去到禮拜五仲有可能喺攝氏三十度以下，但係日本球手錦織圭喺噚日場男單首圈比賽嘅休息時間除衫敷冰，唔知佢真係怕熱，定還是存心騷肌肉呢？
苦戰兩小時晉次圈
舊年喺美網男單攞到亞軍嘅圭仔，禮拜二喺男單首圈對西班牙球手艾馬哥，發揮麻麻，全場有成二十一個冇壓力下失誤，最終用咗成兩小時七分鐘，先至以6:4、7:6同埋6:2贏波。賽後佢話：「今日有啲風，搞到我哋都唔能夠有100%嘅發揮。」除咗風之外，溫度亦可能影響咗呢位二十五歲球手嘅表現，事關佢喺休息時間除咗衫，展示胸前兩塊雞扒同埋小腹排朱古力，仲用包冰敷兩邊膊頭，望落相當引死女粉絲。但最令人疑惑嘅係，衞冕男單嘅華域加居然話唔熱。
呢位喺首圈只係用咗九十一分鐘就以6:1、6:4同埋6:2淘汰土耳其球手伊利漢嘅瑞士球手就話：「我打得唔錯，而且對自己亦好有信心。今日唔係太熱，只係有啲濕同埋有啲風，但整體嚟講算幾好。」至於塞爾維亞一哥迪祖高域都冇投訴話好熱，仲輕鬆以6:3、6:2同埋6:4擊敗斯洛文尼亞球手比迪尼㖭。
華域加唱反調讚天氣好
猶記得喺舊年澳網被熱浪侵襲，頭一個禮拜有成四日都維持喺攝氏四十三度左右，所以今年頭兩日都喺攝氏三十度左右，天氣算係幾好，至少冇好似舊年咁熱死人。但每個人耐熱程度唔同，可能圭仔真係好怕熱都唔奇，又或者佢知自己家陣係日本體壇嘅巨星級運動員，專登騷吓肌肉畀自己班粉絲同廣告商睇吓。
女單方面，戰果相當正常，唔似前日咁有伊娃諾域呢啲知名球手出局，但中國嘅鄭潔、張帥同埋鄭賽賽都出局，其中鄭潔仲輸得頗為肉酸，一度連輸七局俾中華台北嘅張凱貞，最終以1:6同埋2:6落敗。（now670台今日8:00am起直播次圈賽事）
識睇，一定係睇足英台【英波Live】：
http://soccer.appledaily.com
http://bit.ly/engballlive