有「深圳李嘉誠」之稱嘅內地富商黃楚標翻兜做信和置業（083）同埋信和酒店（1221）嘅獨立非執董。點解話佢翻兜？事關佢二○一三年底先至以「其他商務繁忙」為由，辭去信置同信店獨董職位，事隔一年多佢又做番，唔通佢咁快就忙完其他商務？
查實黃楚標真係好鬼忙，身兼多職，佢係深圳東海集團、東海航空、東海公務機董事長，除咗地產，佢仲有經營工業、酒店、航空同旅遊業，最為港人熟識，咪就係佢係香港數碼廣播（dbc）嘅大股東囉。
佢喺二○一一至二○一三年都做過信置同信店獨董，不過翻查兩間公司嘅年報，兩間公司每年舉行四次董事局常規會議，黃楚標都冇出現，真係好忙咁款，唔知佢今次應承信置大老闆黃志祥再做獨董，會唔會記得去開會呢？睇嚟黃老闆都確係好重視呢位獨董。