日本女星酒井法子喺二○○九年爆出吸毒風波後，一鋪清袋，到𠵱家都仲未翻到身，繼續坐冷板。而酒井前夫高相祐一仲衰，去年九月先至離開戒療所。高相前晚出席網上直播嘅清談騷，佢嘅事搵鬼理佢，咁梗係要再擺番酒井上枱，先至引到人注意。
今次係高相五年半前被捕後首次公開亮相，佢打扮騎呢，戒咗毒後勁發福，一副中年阿叔相。講起吸毒舊事，佢話同酒井結婚後兩、三年左右開始吸毒，被酒井發現之後，仲抵死到引誘埋老婆齊齊吸。高相又爆最近有見酒井，佢話酒井今個月初去高相老家探佢一家，雖然好耐冇見面，但酒井就冷待佢，只係笑佢有個大肚腩。高相仲好肉麻咁話對酒井嘅感情冇變，但復合機會相當低！咁真係要恭喜酒井。
高相仲自爆同吸毒被捕嘅著名歌手ASKA一齊接受戒療，佢大爆ASKA怪行，話ASKA成日喺晾衫嘅地方晾起啲零食袋，但係高相又讚ASKA係麻雀高手，又話佢好正常。零食當衫晾都話正常，咁邊個先至唔正常？
撰文：李村姑