樂壇頒獎禮啱啱完晒， 不過近年睇親都好冇癮；除十大金曲分分鐘一半未聽過（可能我太out啦！），還常有此現象：某些歌星肯定不會出席某頒獎禮；某些歌星就肯定在某頒獎禮（的頒獎台）出現；又有歌星全年無新歌出，都可在頒獎禮威盡。總之，各據山頭，自己友圍威喂，公信力？認真，你就輸了。
覺得世界冇以前咁可愛？個世界𠵱家係咁㗎喇！好似剛完結的世界足球先生選舉。最後二十三強候選球員來自十二個國家，你估這十二個國家的隊長和教練如何投票？八成都會選番國家隊或球會隊友！例如哥倫比亞隊長法卡奧及教練比格文都選占士洛迪古斯；比利時隊長高柏尼選泰拔高圖爾斯；12位隊長中，竟只有法國的洛里斯無選「自己友」為首位（選了C朗、圖）。
若整個選舉全由這批「私心王」去選，實變鬧劇。都係傳媒代表「公正」得多：上述十二國的傳媒代表，只有德、阿、葡代表分別選番紐亞、美斯同C朗，其餘傳媒都絕無偏幫自己友。都係嗰句，以前由足球記者選的歐洲金球獎咪幾好囉！有人可能會講：「栢翹，頒獎禮箒！使乜咁認真呀？」啱嘅，球壇頒獎禮，只是球員錦上添花；但是樂壇頒獎禮，其感染力和影響力，卻是整個樂壇興衰的指標；當年《勁歌總選》由俞琤主持的氣氛，現只能在YouTube重溫了。
方栢翹
now足球評述員