A股噚日反彈，但有網友呼籲切勿撈底。內地報火警電話號碼係一一九，前日股市走火警，人踩人，就釀成「一一九慘案」。一二零係內地搵醫院急救熱線，噚日撈底，等於去股市叫白車，恐怕凶多吉少。有心水清股民走去查皇曆。嘩！大吉利是，原來噚日係農曆「大寒」，真係心都寒。
不過，馬上又有大把內地專家財演，走出來派定心丸。國泰君安首席宏觀分析師任澤平去年率先喊出「黨給我智慧，滬指五千點不是夢」，從而被封為「牛司令」。佢噚日話，中證監打孖展，是發出「牛兒，你等等我！」的心聲，中央只是不希望股市升得過快。民生證券研究院院長管清友乾脆以「牛市，你不要走」為題，發表報告，指中央不會放棄股市，叫股民心定。
雖然券商仲不斷唱好，但股價噚日仲未止瀉。《新京報》報道，有阿仔幫阿媽開戶買券商股，而家面對老媽子咆哮，不敢再回家，但佢肯定不夠以下呢位朋友慘情。
呢位股民話，佢上周五買咗國信證券，昨日走上陽台，縱身躍下，但竟然沒有死！原來下面躺滿買咗海通證券的朋友，而他們居然也沒有死！因為他們下面還壓了密密麻麻買咗中信証券的朋友！
李可強