施政報告發表後，左丁山吃過午飯，在IFC行商場，接連碰到外匯C、證券H、保險Y等，問佢地對施政報告財經金融部份有乜意見，佢地無不媽媽聲，不宜刊出。佢地之咁鬼勞氣，皆因梁振英在上星期三宣佈，由上星期四（一月十五日）起，立即終止「資本投資者入境」計劃俗稱移民投資計劃，事先政府保密工夫做得好，冇走漏風聲（即係絕無諮詢），一嚟就嚟，殺金融界一個措手不及，證券保險界當然面黑黑啦。
呢個移民投資計劃在2003年為挽救一潭死水嘅地產市場而推出，截至2014年九月，入境處共收到逾四萬宗申請，投資額達2,058億元，其中逾1,632億（佔總額79.3%）投資於金融資產如股票、債券、保險單等，餘下逾425億元投放在樓房地產，計劃推出之時以地產投資為主，好快就轉向金融資產，投資者有九成人係已取得外國護照（如加勒比海、非洲國家）嘅內地人。
睇吓資金來源及銀碼，明眼人當然知道投資移民計劃為內地有錢人開咗一條通道，等佢地正式合法咁搬錢嚟香港建立狡兔三窟，希望減少政治風險，佢地未必嚟香港居住嘅，我地香港人去加拿大咪又一樣！對香港來講，過往十年因為呢個計劃，湧現咗一個新行業「移民投資」，吸引咗唔少內地券商、本港保險公司及新投資者入行，生意相當不俗。但梁振英不知何故話殺就殺，業界猝不及防，當堂暈得陣。
證券H話：「內地券商有路線引入投資移民，一開戶口，經手人可得5%（五個佣），非常和味，有數得計，移民投資要一千萬元入場費，五個佣就有五十萬，新移民開戶口後，陸續有股票、黃金、外匯、期權買賣，公司開心，所以俾佣金唔孤寒，依家條水斷咗，人人問候梁振英！」保險Y就話「近年一啲投資相連保險計劃好受歡迎，近兩成係由投資新移民買入嘅，而且呢啲保險單張張大碼，做得成生意嘅保險人，無不笑逐顏開。但依家話冇就冇，我地唔㷫就假！」斷咗一條米路，幾難補得番，一啲新入行嘅，更加有可能未收到農曆年利是之前，就聞到魷魚香，收大信封。有移民投資公司過往生意極好，想計劃搞上市，一月十四日即刻緊急煞停，成個IPO項目散晒，專業人士本來就入袋嘅一筆收入，即時煙消雲散。投資移民計劃最大得益者，若不是內地商人就是本港建制派，佢地谷到爆仲唔敢出聲！