「香港龍蝦軍」高調成立，卻又躲在鐵閘後偷偷摸摸舉行儀式，把自己當成麻瘋病人，生人勿近。
本人和海鮮界素有來往，做了絕密採訪，探得香港龍蝦軍成立秘密。
問：你係被逼定自願參加？答：我只能夠話，總有人係自願想轉台睇亞視。
問：龍蝦軍儀式點解要咁自閉？答：家醜不出外傳。
問：組織有無會歌？答：有。「你叫我做龍蝦吧，將啲𡃁仔去綁架。似木頭似石頭聽話，忠君愛國嗎？」
問：點解要搞呢壇嘢？答：無嘢㗎，社團爭地盤之嘛。呢期興𡃁仔，係小朋友先有力氣舉雨傘舉足2個幾月，所以阿公咪吹雞叫人收𡃁囉，費事俾「學」字頭收晒。
問：你覺得啲𡃁仔會埋邊堆呢？答：我討厭政治，不問立場，齋睇個樣。雨傘陣營，一個鋒鋒上咗時代雜誌；康康同輝輝就sell靚仔。龍蝦軍呢邊，不論清蒸定芝士焗或者上湯煮，都係一隻龍蝦。𡃁仔無嘢㗎，跟大佬最緊要型，你出嚟行同人講你跟康康輝輝，大把少女尖叫要你幫手拎簽名；話俾人知你跟689個老婆，啲人盞倒抽一口涼氣然後笑你刻毒涼薄，真係X到無朋友。仲有，家陣咩年代，仲叫總司令，Radiohead就叫電台司令。你叫自己司令，咁跟你個啲𡃁仔莫非係你隻兵？做龍蝦隻兵，好重口味囉。
問：文革嗰陣，毛澤東就寫過一張《炮打司令部》，指控劉少奇鄧小平是中共黨內的一個資產階級的司令部。答：叫自己做總司令，即係話自己係要搞對抗，隨時被人炮打司令部。
問：你哋宗旨係要認識中國公民的責任同義務，點解唔介紹中國公民應享的權利，例如選舉及被選權、人權、法治保障……答：中國公民，係無權利㗎。