刨完港交所（388）份停板機制嘅諮詢文件，好失望，失望在於港交所連起草一份有說服力嘅建議書都無能為力。一台獨大TVB（511）拍劇是是旦旦，原來，一所獨大港交所建議書都係求求其其，咁多年畀咁多交易所徵費真係無辜。
淨係講引入停板機制，最失望係推論部份。成份文件刻意堆砌稻草人叫「閃崩」，恐嚇投資者，但「閃崩」對市場影響有幾深遠就冇具體講；只係為咗嗰幾分鐘甚至幾秒鐘嘅「閃崩」，而將現有交易制度推倒，值唔值得冇講過，亦都冇具體講明有乜好咗。如果實施後失敗，邊個要引咎下台，或管理層如何負責等等當然都冇講。
入得場 預咗有波幅
報告又話因為香港印花稅貴所以高頻交易無利可圖，所以一直都冇「閃崩」。即係「閃崩」呢個稻草人，又自己喺報告入面消滅咗。剩低唯一理據就係外國有所以抄。如果吓吓靠抄，李小加又對唔對得住佢份三千八百萬元年薪呢？又需唔需要花咁多錢請個「抄政總裁」返嚟呢？
炒得股都係成年人，升跌已經預咗，咁驚波幅不如返屋企睇TVB好過。委任呢個驚波幅驚過師奶嘅李小加做行政總裁，心態決定境界，唔怪得港股喺環球股市升浪中無波幅，累到股民搵唔到食，原來係因為委任一個師奶胸襟都不如嘅李小加。
資訊不對稱未解決
所謂閃崩即係急跌，如果基本因素受損，下跌反映價值係自然嘅事，一次過跌晒同分幾次冷靜期根本冇分別，無需要磨爛蓆；驚嘅係掟錯貨，見跌得多人掟你又掟。不過持貨力、EQ都係贏錢因素，俾人震甩都係衰自己，停板機制仍然冇道理。
真正唔公平，來自資訊不對稱，解決方法係增加資訊。又以比亞迪（1211）舊年暴跌為例，如果當時停板五分鐘「冷靜」，上市公司聽大戶電話先，定聽散戶先？資訊不對稱只會更嚴重。
港交所大把嘢可以降低訊息不對稱，例如公司重大波動時幾時發通告、停牌，有更清晰準則，通告可以提供更多資訊。平日就增加營運資料發佈頻率，上市公司愛搵分析員記者「巡廠食飯」，港交所又有冇諗過要求上市公司應用喺散戶身上？收三千幾萬元人工只係抄到一條停板「絕橋」，李小加真係可以「畀啲掌聲自己」。
報告又自問「是否使香港與內地交易所的做法看齊」，自答隨便拋低句「與內地看齊並不是目的所在」就否定當解釋。港交所係咪已經淪落到冇人有能力提出合邏輯嘅理據？
高明已經未從道理上同港交所辯論，包括「價值投資股價最終反映價值」、「停板會陰乾港股」等等大事大非角度作質疑，單係從論證水平之低，反映港交所真係老化。由一個脫咗節嘅機構去教大家「同國際接軌」，this city is dying，莫過於從監管機構內部腐化。
呢份報告，零分重作啦。
高明
https://www.facebook.com/BigRiceTea
版面調動關係，高明暫代王昇一天