今期（21日）第四場四班1000米，有三駒在港初出，不約而同都係試閘有速度嘅馬，而且都排內檔，以及用騎功頂級嘅外籍好手，如果其中一隻勝出或包Q，就至構成三重彩都唔奇。
先講配柏寶嘅「星星星」，馬主馮元璋女士大家可能陌生，但你一定識佢個仔，就係歌星鄭中基，馮女士過去養過「愛得威」、「搖滾雄豐」等馬，但佢好低調，就算贏馬亦多數只由鄭中基爸爸鄭東漢拉頭馬。講番「星星星」，喺澳洲三次試閘全部勝出，血統係正宗早熟種，最近在港試閘亦有好走勢，拍住今場另一初出馬「花紅」喺前列過終點，彼此已經準備妥當。
至於「花紅」，馬主團體成員中環心臟科名醫高德謙，乃薛家燕姐夫，高醫生過去好多馬都以「心」字命名，好似曾兩捷嘅「心歡笑」、「心歡暢」等。而「花紅」近兩次在港試閘一冠一亞，今次獲雷神垂青操刀，當然係Chance馬。仲有「和平開心」，在港只試過一次閘，就係上月初800米草閘一放到底，之後就冇再試，馬房似乎對佢嘅進度好有信心，唔想試閘咁多，費時畀人吼到實，今次配潘頓亦不能睇低。