阿爺講一句，內房封盤嘅封盤、孖展話停就停，實施「一國兩制」嘅澳門，銀聯交易仲話將會被公安實時監控，以上幾個板塊，就咁就被人喪隊，所以話而家最大莊家根本就係阿爺。中資金融股唔敢掂的話，可考慮核電股，「大莊」嘅阿頭，即係習總，就話要提升核電業競爭力，加上內地有傳媒報道，沿海核電項目有望今年首季批出，內陸核電或於二零一六年進行試點。正如習總話齋，核工業是高科技戰略產業，理應冇乜政策風險，上海電氣（2727）可以逢低吸。
唔想玩中資股，港資嘉里物流（636）都可以一博。有報道話公司計劃將嘉里（柴灣）貨倉改成骨灰靈位中心。香港人生前面對住屋問題，過身後都驚唔夠靈位，令私營龕位價格大漲，甚至有內地客落香港炒陰宅！報道指，未計補地價，嘉里物流會投資二十億元，將貨倉改建成一座有如甲級商廈嘅超新式骨灰中心，龕位約十萬個。以沙田寶福山為例，現時一般由七萬六千元起跳，最靚嘅位更超過五十萬元。保守計，如果嘉里以平均一個龕位十五萬元計算，十萬個即係一百五十億元，重申呢個係最保守嘅計算。另外，公司最近宣佈收購加拿大兩間海運、空運公司TLP之多數股權，進一步拓加拿大貨運網絡。目前PE只約8.5倍，加上有新概念，股價11.8元左右有支持，可以留意。
Fifi
http://www.facebook.com/lovefrystock
本欄逢周二、四刊出