如果要數香港咁多個選舉中，邊個最唔受到市民注意，花生友認為係村代表選舉囉。點解？因為選出嚟嘅村代表，只負責嗰條村嘅事務，管轄範圍細，除咗相關村民，普遍市民都唔受影響，咁又點會嘥心機去理個選情吖！花生友問一問身邊嘅朋友，十個有十個都話唔知，原來村代表選舉已經選完，咁就知道市民有幾關心啦。
嗱，花生友對村代表選舉呢種圍威喂式小圈子選舉都唔多感興趣，但都金睛火眼𥄫實，事關結果足以影響三月舉行嘅鄉事委員會改選。
花生友近日向鄉紳打聽過嘞，基本上各鄉委會選情唔會有太驚人嘅結果，換上嘅新面孔唔多，來來去去都係以劉皇發及張學明篤定翻閹屯門及大埔鄉委會主席最受注目。
但花生友同時推介八鄉鄉事委員會改選，有鄉紳話係「有競爭嘅選舉」，過程肯定好有霸氣。原來喺曾憲強爭取連任主席之際，據聞有個幾有界別知名度嘅橫台山河瀝背村原居民代表鄧瑞民，都有意喺今屆上陣爭主席，點知曾、鄧惡鬥之餘，屬元崗村嘅張鎮發都表態話想爭吓。嘩，唔少鄉紳知道八鄉可能有三位「猛」男大戰，都話場戲緊張度好睇過《竊聽風雲3》。
其實爭取連任嘅曾憲強向來較低調「文靜」，鄧瑞民同張鎮發則比較有「霸氣」，屬新田委員會主席曾樹和嗰隻type，唔知最終霸氣派會唔會跑出？如果跑出，「猛」人進駐嘅鄉議局，以後嘅會議肯定精采過立法會。江湖唔知會唔會，從此更多事？
花生友