所謂好腰好腎好男人，但自由黨榮譽主席田北俊可能暫且未能做到好男人住。話說噚日佢喺政制事務委員會，借五歲童都識問，若然普選立法會係咪代表全面取消功能組別後，等完林鄭回應無耐就走人，其間仲㩒住條腰，睇嚟應該有事。
田少自爆，原來佢早幾日打網球，一不小心扭親條腰，所以要發言完畢之後，就要走人去睇醫生，希望快啲好番。田少今年六十七歲，平日都做唔少戶外運動，好似上個月底佢去咗歐洲滑雪，全程左扭右扭，應付自如，被盛讚係滑雪高手，但今次打網球出事，睇嚟田少下次都要做好熱身運動先打波，否則一旦重傷，大家就會聽唔到佢嘅精警言論。